LA RENTRADA : en classa !

55 000 mainatges deu departament de Pirenèus Atlantics que son tornats a l'escòla aqueth dimars prumèr seteme. A Baiona, 2 265 escolans que son escolarizats dens las 20 escòlas publicas de la vila . Qu'ei 159 de mensh que l'an passat.

Franck Dolosor

9/1/2026

Dab 10 milions d'euros consacrats a l'educacion, la vila de Baiona qu'ahorteish lo son engatjament entà ua escòla publica de proximitat e inclusiva dab la creacion aquera annada d'ua Unitat d'Ensenhament Mairau Autisme (UEMA) dens l'escòla Lahubiague. Tres ans après l'obertura d'ua unitat elementària a l'escòla Brana, aquera classa navèra qu'arcuelh sèt mainatges de 3 a 6 ans.

A la rentrada 2026-27, las ueit seccions bilinguas e immersivas en lenga basca qu'arcuelhen 545 mainatges, sia un quart deus escolans de la vila. En 6 ans, lo nombre d'escolans bascofònes qu'a aumentat de 65%.

Tot com a Anglet, la municipalitat baionesa que desira prepausar un ensenhament en lenga gascona. « Que s'ageish d'un objectiu qui avem ciblat e qu'i devem tribalhar entà qu'aquò sia lèu ua realitat. Aquò que pòt méter temps mes que cau lançar lo projècte. Que devem estar fòrça de proposicion pr'amor que la promocion de las lengas minoritàrias passa per las collectivitats » qu'explica Christine Martin-Dolhagaray adjunta delegada a l'educacion, a l'enfança e a la joenessa a Baiona.

Dens lo Baish Ador, actuaument sola l'escòla publica de Bidaishe que -auhereish un ensenhament bilingüe gascon francés . A Samas e Came, las escòlas publicas que prepausan un ensenhament ahortit de l'occitan qui ei egaument ensenhat au collègi de Bidaishe. A Saint-Palais, lo licèu Jean Errecart que prepausa ua opcion occitan-gascon despuish 2003.